RUNGGU: ANTUSEN RAS GUNANA
(Betlehem Ketaren, SH)*
Paksa kita kita kitik-kitik denga pe ndube, man banta enggo me rusur imamahken kerna kata ”runggu”. Kimaun tupung nande ras bapanta ersikap-sikap muat berkat kirumah-kirumah, nina: ”Enda kami ku rumah mamandu lako ngerunggui kerja impalndu!”, entah pe sibegi ka megati cakap nande kempak bapanta, umpamana alu nina: ”To dage ku si mate-mate ndai, ula kari lalap lenga runggu!”.
Tep-tep kuta pe ndube, lit rumah si nigelari Rumah Bale, e me ingan runggu guna ngerunggui runggu-runggun kuta. Terdauhen, i kuta Raya Simalem, kuta kemulihen Ketaren mergana si biak perbapan Karo-karo Sepulu Dua Kuta, ndube lit sada uruk si nigelari ”Uruk Runggu” lako jadi ingan runggu Karo mergana ras Anak Beruna ngerunggui keperlun-keperlun kuta si sepulu dua e me kuta-kuta si lit segedang-gedang dalan galang, Doulu nari seh ku kuta Kandibata. Si bagenda rupana maun pe lit ka nge ndube ijah-ije ibas tep-tep terpuk persadan-persadan kuta i Taneh Karo Simalem enda.
Antusen Runggu
Runggu e me sada lakon arih-arih muat si mehuli ibas kesemalen adat. Runggu tuhu-tuhu jadi bagin kegeluhen ibas kita kalak Karo, janah ibas runggu me adat e tangkas teridah dingen nggeluh, janah kegeluhenna banci ikataken jadi palas ras tampuk kegeluhen adat Karo, nginget maka tep-tep lakon peradaten anem kitik-kitik seh ku lakon si mbelin: ibenai, ilakoken ras idungi me ibas runggu. E maka adi lit runggun Ngembah Belo Selambar, runggun Erdemu Bayu, runggun Mukul, runggun Ndungi adat Cawir Metua, runggun Ngampeken Tulan-tulan ras lakon-lakon si debanna, pulung me sangkep nggeluh, dingen itengah-tengan kepulungen e ilakoken me runggun si nibabai anak beru pekepar, mbaba cakap runggu kempak kalimbubu seh ku puang erkelangken biak senina si mada lakon.
Lakon tah pe Guna Runggu
Megati kal kalak si nguda denga nungkun-nungkun sapih-sapih ia, nina ”Engkai maka runggu lalap ras lalap runggu, adi kin labo lit kerna si mbaru si nirunggui? La kin iangka tua-tua e maka gendang enggo terincuh lako ilandeki, la kin ndia madat-madat matana ras engkai maka e...e.. saja sinicakapken seh melawen?”. Situhuna runggu e tuhu-tuhu erguna, janah gunana, e me kap:
1. Lako ngerencanaken, nimbang-nimbang ras lako netapken perdalinen kegeluhen rikutken adat. (”...dage, meriah nge ukurndu bere-berendu erdemu ras...mergana sue ras penungkunen anak beruna?”, ntah pe ”...ibas terang-terang wari pagi, rumah apai nari ibas kam si ngalo bere-bere berkat ku jambur?”), ras si debanna.
2. Lako erbahan perdalinen kegeluhen peradaten jadi pinter, rembang tengah dingen erlayas. Kiniras-rasen tuhu siawin-awinen ras kepentingen pekepar si nirunggui, tapi ibas runggun, anak beru raduken ras tembe-tembena ras biak senina rimbangken anak beru temanna ercakap, erbahan ketetapen, keputusen arah sukaten uga orat adat, uga kin pendalinken jelma si enterem kerna isi si nirunggui. Rikutken ras penungkunen-penungkunen gelah runggun tetap ertetapen erpalasken kesemalen si sue ras adat dingen erkiteken si e la njuruken ilebe-lebe jelma si enterem.
3. Lako pepantek kiniersadan ibas rakuten kinikuhen sangkep nggeluh. Ibas runggun me peradaten ilakoken, e maka ije pulung kerina sangkep nggeluh jadi si njayam ras jadi saksi runggun, e me sukut si mada dahin (sembuyak, senina, sepemeren, sendalanen ras sepengalon), kalimbubu si telu-telu sada dalanen (si ngalo bere-bere tupung lakon nereh ras igelari si ngalo ulu emas tupung pe-empoken ras ikataken ka kalimbubu si mada dareh tupung ngadati kalak mate tah pe tupung lakon mengket rumah) ras puang kalimbubu si telu-telu sada dalanen radu ras kerina anak beru (anak beru dareh/cekuh baka, anak beru cekuh baka tutup, anak beru tua ras si niapit anak beru si niangkip ras si ibas tegun empo, anak beru menteri bage pe anak beru si ngikuri. Mbelin gia kerja si nilakoken adi lit si la pulung tupung runggu ras ibas mata dahin, ia si la banci lang muat bagin ibas lakon e, maka lakon e la metunggung janah juru me si mada dahin, tapi kitik-kitik gia kerja ni lakoken tapi pulung ije si biak pulung rikutken biak lakon e lakon kitik-kitik maka lakon e labo juru, idur mata si enterem.
4. Lako pebindangken (sosialisasi) isi runggun. Gia isi runggu rusur ikataken kalak si nguda denga la lit perubahen, gel-gel saja, tapi si tuhuna runggu e erguna kal lako pebindangken ulih runggu e, jadi momo man jelma si enterem, janah lako si e kerina si pulung ibas runggu, subuk si biak runggu, si jadi saksi runggun bage pe si ninggel-ninggel, arus me muat bagin pembarken ulih runggun. E maka adi kin runggun lako erbahan kerja umpamana, kerja e la serung ras kerja si deban ibas sada kuta ntahpe sada perkade-kaden, persima-siman, erkiteken kenca dung runggu, i kede, i rumah tah pe i tapin pe ipebetehken me isi runggun e man kalak si nijumpai. Seakatan si e kerina si runggu jadi si njayam ulih runggun erdalin sentudu ras si nirungguken. Lako si e ibas runggu Ngembah Belo Selambar umpamana ibahan me tanda ”inget-inget”.
Tenah Surat
Arah kai si enggo isuratken idatas, siantusi me, maka runggu erguna lako pepantek adat raduken ras kerina lakon-lakon kegeluhenna. Runggu ntah pe rapat ninta ibas cakap si genduari, tuhu jadi bagin sada dampar si penting subuk ibas kegeluhen perpulungen-perpulungen, rarasen-rarasen bage pe ibas kegeluhen pemerentahen. Tep-tep terpuk kegeluhen e, banci saja enggo itetapken torosen (tata tertib) runggunna subuk alu isuratken tah pe alu la isuratken. Nginget-nginget maka kitik-kitik nari kita imamahi kerna antusen ras lakon runggu, arusna min labo sukar siakap erbahan tah pe muat bagin ibas sada runggun! Alu bage, oratna min labo cakapta dua-dua tah pe telu-telu ateta jadi ikuten, tah pe adi enggo ngerana kita ras kemberahenta, anak-anakta tah pe teman kompakta, labo min siakap kita enggo runggu ibas gelar perpulungen, ibas gelar kuta apai ka ibas gelar jelma si rulo! Makin arah runggu kerina si biak runggu muat bagin ngelakoken tugas-tugasna dingen reh tetapna ukurna dalankensa, janah arah runggu me tep-tep si runggu ras kerina ginemgem ngerencanaken nimbang-nimbang ras netapken kai si niarus idalanken sentudu ras paksa ras inganta tading? Ma kin ibas runggu me inganta ras-ras erpenulih ku pudi kerna kai ras uga dahinta ras uga ka nerusken ras erbahan tetap erlayas? Adi bage, tentu kita la mungkin jadi si man runggunken! Sebab nina kalak pentar: ”Sabap adi jalan pintas niakap pantas maka melala si terulin jadi ketadingen!”. Bujur.
Tidak ada komentar:
Posting Komentar