NGAYAK-NGAYAK CAWAT LA MERIGAT
(Betlehem Ketaren, SH)
Erkite-kiteken enggo tembe me pelajaren kerna pertapan iajarken, dingen enggo terpenalem niakap guru lako itadingken, lawes me guru e nadingken anak didikna e sekalak ngiani sapona, sada sapo-sapo iduru lau. Alu meriah ukur pe igeluhken anak didik e geluhna erpalasken kepentaren si enggo ialokenna. Bagi si enggo ialokenna pelajaren, ia arus gedang-gedang wari ertapa, kentisik ngenca banci paksa ipakeken lako nusur ku kuta mindo-mindo nakan si man asa cukupna lako nakan si tep-tep wari.
Tep-tep erpagi-pagi kenca dung ridi ikirahkenna cawatna i pengkirahen, cawat me erta si mehergana lit ibas ia. Ibas sada wari getem me pusuhna natap-natap cawatna enggo merigat iketep menci. Alu ndele atena ipala-palaina mindoman anak kuta gelah ialokenna cawat sambar cawatna si enggo getem. Meriah ukurna lit si erkuah ate mereken sada cawat, janah bagi biasana dung kenca ridi ikirahkenna ka i pengkirahen, tapi ibas piga-piga wari minter ka getem iketep menci.
Mulihi arus ka ia reh ku kuta mindo-mindo perkuah ate gelah daten sambar cawatna, dingen ipindona pe sada kucing lako iasuhi gelah ulanai cawatna e iganggu menci. Meriah ka ukurna sabap tep-tep ikirahkenna cawatna lanai pernah iketep menci, tapi erkiteken lit kucingna, tambah ka me arus dahinna mindo-mindo, seakatan mindo-mindo guna nakanna si tep-tep wari, aruska ia mindo-mindo susu guna kucingna sue ras cukupna si tep-tep wari. Emaka rukur ia dingen nina: “enggo mbuesa dahin kupakeken lako mindo-mindo, janah geluhku enggo mbuesa mberati anak kuta. Mehuli me adi kupiara saja lembu, sekali nari ngenca aku mindo, jenari enggo lit tetap susu guna kucingku!”
Meriah ukurna kenca enggo ka ialokenna lembu ibas kalak si erkuah ate, tapi la ndekah kenca si e minter ka turah tumpat ibas ukurna, sabap tep-tep karaben arus ka mulihi ia ku kuta lako mindo-mindo gagaten lembuna e. “Lalap nari nge mindo-mindo, la banci lang mberati anakkuta me geluhku enda!”, nina ka ngukuri bana. “Joren me ku rungkah taneh i deher sapo enda, ku suani kerina sinuan-sinuan gelah lanai aku mindo-mindo!”, nina ibas pusuhna lako nuanken sura-surana. Kenca taneh enggo irungkah, isuan me page ras gule-gulen rikut ras adumna kerina dingen la ketadingen lako nakan lembuna, la banci lang lanai bias tanna sekalak ndahisa, janah enggo terganggu waktuna lako ertapa. Emaka idilona me teptep wari aron lako ndahisa, tapi bage gia latih ka akapna mperdiateken aron e. Tep-tep ia ertapa minter kurang pendahin aronna, emakai ibuatna me sekalak diberu jadi ndeharana lako jadi temanna sisampat-sampaten. Salu bage ertorosen kerina pendahinna sue ras sura-surana janah la ndekah jadi me ia sibayakna ibas kuta e.
Ertahun-tahun ia erdahin dingen nggeluhken bana ras ndeharana, enggo galang pe rumahna ipajekken rikut ras rumah-rumah aronna. Metunggung ka pe ibahanna karang kerina asuh-asuhenna gelah la banci pulah enth pe bene. Kerinana enggo sikap sue ras sura-surana lanai me ia pernah mindo-mindo apai ka lako mberati anak kuta.
Tupung mentas guruna lako meteh ntah uga kin kegeluhen anak didikku ndube, bage atena, mamang kal atena sabap enggo piga-piga kali kuta e isiar-siarina, la lit idapetina sapo iduru lau bagi ndube itadingkenna. Nungkun me ia man sekalak jelma si ijumpaina, nina: “Ma ijenda kin ndube sapo anak perana, anak asuhku si ku suruh enggoluh lako ertapa?” Mamang ate kalak si isungkunna e dingen sope ia erjabab, reh pe anak didik asuhenna e njumpai ia.
“Engkai maka bagenda jadina, anakku, enggo kuidah salih kerina kenca kam kutadingken?!”, nina guru nungkun. “Bicara kuturiken pe kari ntah mamang denga nge atendu,bapa!. Sienda kerina la banci la kulakoken, lako ngayak-ngayak cawatku gelah ulanai sempat merigat, sabap adi merigat. La banci lang arus aku mindo-mindo lalap ras erkiteken sie terganggu paksaku lako ertapa. Erkiteken ngayak-ngayak cawat la merigat, maka enggo bagenda kerina jadi!”. Ngupir me guru ndai gedang-gedang dalan janahna lawes pedauh bana.
Tidak ada komentar:
Posting Komentar