Meleset Lalap Sung-sung pe Gawat!

MELESET LALAP,

SUNG-SUNG PE GAWAT!

            Sekalak Pastor si enggo pernah ertugas i paroki Buluhnaman, eh... St. Petrus-Paulus Kabanjahe nge kuakap, mulihna sekolah i Roma nari, dingen sope ertugas ku Siantar isempatkenna bana ku Buluhnaman, sabap merincuh kal ia man sada pangan si sempat ndekah kal ndube ipantangkenna, tapi dungna  kenca icubakenna piah nagih ia, e me kap Menci!

            Ibas nangkeng-nangkeng kenca lewat Gertak, jumpa me Pastor e ras sekalak anak perana si sangana maba medil, e maka ipengadina motorna ras iendik-endikna me anak perana e lako ras-ras erburu Menci!

            ”Tenang kam Pastor, keker alu manjar-anjar, tembak!”, nina anak perana e, ras katepor me sora medil, tapi meleset, Menci la kena, tapi kateper me Ndukur ban senggetna. La gejap Pastor e, nina: ”Adah nandena e, erkai ka kin maka papak si kena!”. ”La banci bage ngerana, Pastor, kemali bage!”, nina anak perana e ngingetken Pastor e gelah sikap ngerana.

            ”Ota, ota..., terbagesenlah kita. Ijah kari tentu melala Menci, nina Pastor e janahna lawes duana nadingken Ndukur pantangen nini Tarigan Sibero e ampar-ampar i babo dalan.

            Iidahna ka Menci ngepari galungi si kiam kempak lau anak, maka minter itempakna, katepor..., tapi meleset lalap, kena me Berkih si enggo berngan iombakken lau piga-piga wari si lewat. Maka sekali nari meleset ka Pastor erbelas, nina: ”Adah nandena e, engkai ka maka pantangen Tarigan Silangit enda ka si kena. Ma kin ban ndai pe engggom mate, lang banci nge kita meling ban Fransiskus!”.

            Merawa anak perana ndai nina: ”Nangdangi nampok me kita kari ku batu ah, adi malpak lalap kam ngerana Pastor!”, nina alu mbiar, mbiar kena cilaka. ”Salah kal aku..., lanai ku ulihi, adi kuulihi kari dumpang perkas gia aku!”, nina alu tutus ras semangat erjandi.

            Deherken tapin, idah kalak ndai ka Menci, maka minter ka ikekerna, itembakna, ...katepor sora medil, tapi meleset lalap, janah menam pe kena kalak si paksana erbuang. ”Adah...”, nina ka Pastor e, minter me reh perkas janah dumpangna me anak perana ndai. Sengget kal kalak si sangana erbuang e piah lompat berteng ia nadingken gonjena, tapi senggeten ka Pastor e ngidah temanna, anak perana e keteper bagi ndukur. ”Iyah lakap aku ngenca si meleset lalap, ari..., si nidatas pe kap meleset kang sung-sung, gawat...!”, nina janah nanemken anak perana e ku kubang gelah ula sempat mate. (BK).